Guten Morgen, Wasserburg!

In ihre Haar warn immer frische, geibe Ringlbleame.
De geiben Ringlbleame hods anscheinend ziemlich gern meng.
Gredt mit eana, glacht mit eana, recht vui Bledsinn gmacht mit eana,
Sonst hod koaner mit ihr glacht – es is einfach zum Reahrn gwen.

Wenn de anderen drunt im Pausenhof am Boi nochglaffa san,
is sie ganz aloa am Fenster gsitzt und hod in Dog nei dramd.
Koana woid sie in der Mannschaft – alle hamses oft dableckt,
und ham ihra dicke Bruin ganz gern im Buama-Klo vasteckt.

Ois hods ausprobiert und immer gschaut, wos d′Leit erwarten.
Erniedrigungen san ihr nur de wenigsten erspart bliem.
Ned oamoi hod si oa Flaschen draht auf Klassenfahrten.
Ois was ihr übrig bliem is, war, auf d’Chance zu warten.

Ringlbleame fliag amoi …
Ringlbleame bloß oamoi …

Zehn Jahr san verganga und jeder hod sein Weg no gmacht.
Künstler, Manager, Bankier, alle hamses recht weit bracht.
Glangweilt hear i mir de Gschichtn o, weil ses so gern verzein.
Beim dritten lass i mir vom Kellner glei an Schnaps herstelln.

Alle Mädels san heid do, oane schicker wia de ander.
Aber Oane geht ma o, i laß de Aung no oamoi wandern.
Ganz nach Gfui suach i zuallererst moi so am Rand lang.
Doch weder do – no in der Mittn steht sie umeinander.

Da foid mir auf, i hob sie gseng as letzte Moi vor zehn Johr,
I hoff, ihr Chance is in dera Zeit dann doch no kema.
I red mir ei, ihr Leben is jetzad ganz bestimmt vui scheena.
Und wieder gspür i leicht des schlechte Gwissn in mir brenna.

Und wenn i sog, i war auf ihra Seitn, miassad i liang.
A wenns einfach waar, derfs i ned nur auf de andern schiabm.
I hoff, as Ringlbleame hat trotz allem glernt zu …
I hoff as ringlbleame hat trotz allem glernt zu …

Ringlbleame fliag amoi …
Ringlbleame bloß oamoi!